點解5G 會用多左數據 ? 咁幾多數據先啱你用?
日期: 2020-04-21 16:04
OFCA數據用量計算機
點解啲人成日話5G會用多左數據 ? 點解啲人話100GB 遇上5G好快燒晒 ? 唔通同一套劇用5G 睇會比4G用多左數據?
原理上如果你睇一套3GB嘅戲其實無論你用4G 定係5G速度, 睇晒嘅話最終大家都係用左3GB嘅數據。 因此由哩個角度出發, 理論上並無用多左。但月結單會話你知用多左好多!
下載速度快, 想停都停唔到:
喺4G嘅年代, 你上網睇套大約3GB數據嘅戲, 過程中其實佢係不停下載緊, 假如你睇睇下喺中途停左, 當時可能只係下載左2GB, 咁你就只係用左2GB。 但係5G 嘅世界,由於下載速度相對4G可高達20倍(理論值), 可以快到幾秒就下載晒, 如果你同樣睇睇下唔想睇, 「唔好意思」由於你已下載完成, 因此都會計你用左3GB數據。
人類對質素嘅追求:
諗返以前3G 嘅年代, 我地睇片多數都係720p, 即一套Netflix 嘅電影需要大約1.5GB數據。 當我地去到4G年代, 我地自然地會選擇睇1080p質素嘅戲, 同樣一 套Netflix嘅電影就要大約6GB數據。 係5G年代, 你會選擇4K質素, 同樣一套Netflix 嘅4K電影就要大約14GB數據, 所以, 人類天生對質素嘅追求會令你進一步用多左數據。
網上睇片所需數據參考值
影片質素 | 720p | 1080p | 4K |
Youtube 睇60 分鐘片 | 1 GB | 1.8 GB | 6.5 GB |
Netflix 睇一套電影 | 1.5 GB | 6 GB | 14 GB |
Now E 睇一場波(90分鐘) | -- | 2 GB | 8 GB |
我唔睇4K片, 唔聽24 bit 嘅歌
當然你有權照聽16 bit 嘅歌, 睇1080p 嘅戲, 但電訊供應商會不停地推出一啲更高質素嘅東西,例如24 bit 高清音樂 , 4K影院, VR (虛擬實境) 等, 而且仲要係「免費」俾你用, 俾你有更好嘅享受, 同時亦更快消耗你嘅數據。 而且巿面都會不停地推出更多更高質素嘅東西, 所以或者無得你揀, 你亦只可以接受。
網上聽歌所需數據參考值
音樂質素 | 16 bit | 24 bit |
Moov 串流聽60 分鐘 | 0.5 GB | 2.2 GB |
咁我要用幾多GB 嘅計劃 ?
「報價鴨」覺得雖然哩一刻未有急切轉用5G 計劃,始終覆蓋有限! 但如果你真係想感受下快感,預左數據會用多左, 根據研究機構Tefficient 於2/2020 發表關於全球首個使用 5G 嘅國家南韓所做嘅調查顯示, 當地4G客每月平均使用9.8GB流動數據, 但5G客就每月平均使用27.3GB流動數據。所以當你選擇一個5G 計劃時, 大約要預以你現時實際每月數據用量嘅 3 至4 倍會比較穩陣。
如果想知你現時每月數據用量,當然可以查閱帳單或手機,亦可以參考以下由OFCA(通訊事務管理局辦公室)提供嘅「數據用量計算機」去估計下每月大約用量。詳情可按以下連結;
OFCA數據用量計算機
分享 |