對於某啲人黎講， 等鋪光纖仲難過等上樓， 條 8M 線可能由你出世就陪住你大， 5G 嘅出現終於可以講句: 「忍夠啦8M」我要轉用5G SIM當寬頻 !
5G Router 一啲都唔平
如果有你哩個打算，而假設你個地址又有5G覆蓋。 你要預左自備支援5G SIM 嘅 Router， 但價錢就真係一啲都唔平， 以華為 5G CPE Pro Router (H112-372) 為例， 都要大約$2300。
圖片取自網絡, 只供參考
SIM Plan 數據有限制
始終而家都叫做前5G時代， 基本上都唔會俾你無限5G 數據。而且哩一個限制短期內都睇唔到會解除， 否則個個用張5G SIM 取代屋企條寬頻， 咁並唔係電訊商樂意見到嘅事! 要知道， 如果你個 SIM Plan 得100GB 黎講， 你當家用寬頻咁用， 10日8 日都玩完。 之後一係買佢怕， 再課金買數據， 一係就斷網或者限速。 因此如果你現階段諗住用5G SIM Plan 取代條8M 線， 其實係現階段並唔太合適 ! 除非「錢」並唔係你考慮因素!
5G 家用寬頻登場 ?
「報價鴨」覺得， 隨住香港係1/4/2020踏入5G世代， 無線流動上網嘅速度亦都可以媲美實線寬頻嘅速度， 而且各大電訊設備生產商都喺舊年都已經發布左5G SIM 卡Router。 即意味住我地隨時可以進入高速無線寬頻年代，問題係幾時推出啫?
「鴨仔」覺得理論上PCCW 及 中移動 都應該會較快推出， 前者嘅村屋客近年俾萬匯夥拍 香港寬頻 或 HGC 逐條村攻陷。 而後者近年為左搶佔巿場更加係不惜工本， 所以估計因各自所需下該會針對性地推出 5G 家用寬頻計劃， 預計到時應該係用植入張5G SIM卡係個Router俾你用， 或者仲會鎖定接收範圍， 等你唔可以當佢 WiFi 蛋咁捧住佢周圍走， 但哩個都唔係重點， 所謂重中之重係可以透過 5G 逃出 8M 嘅掌控。 而預計5G家用寬頻嘅數據用量方面應該會有更合適嘅安排。
不過就未知會否以唧牙膏方式先推出300M， 跟住500M 或1000M 就難以估計。 但點都好， 無論係300M 定係1000M ， 理論上同8M比係另一個世界， 所以如果你現時地址未有光纖， 唔好急住用5G SIM Plan 當寬頻， 不妨等多一陣，真正家用 5G 寬頻應該就快登場。