提防「電話異常」騙徒 日期: 2019-12-20 17:12

小編今日收到一個電話， 無來電顯示， 話說接聽左之後原來係一個預錄嘅語音提示， 內容是咁的:


開場白:

「(廣東話) 以下係中國移動香港通知， 閣下的手提電話服務異常， 將會於今日停止服務， 如需聯絡服務員請按 (9) 字」。


其實我都唔係用緊哩間公司? 小編轉左台啦! 不過我都想知有幾「異常」， 所以我都撳左(9)字 (其實你撳咩字都有人聽)， 因為想知佢地講咩!


撳完個(9)字，又有語音提示:

「 (廣東話) 閣下的要求即將由普通話服務員接聽」 其實我都無話要普通話?


騙子出場:

跟住一把扮到好似CS嘅女接線生就出場啦。接線生(操普通話) : 「喂! 中國移動香港， 請問你要查詢什麼?」

小編(廣東話):「你打俾我喎.......」，都未講完， 佢就收左線啦。


上述明顯係電話騙案， 「報價鴨」其實早前都提及過當時經常出現「閣下電話異常， 服務即將終止」嘅電話騙案。 而當時有關公司甚至都向客戶出通告澄清並無其事， 估唔到又黎， 所以大家真係要留意。


電訊公司打俾你， 一般都有來電顯示

你可以記低個電話， 打返去官方HOTLINE查證下該公司有無相關號碼， 唔好輕信。


電話公司停你服務， 一般都係因為欠費

欠費一般都係SMS提示或者語音提示， 而且會單刀直入講明欠費提你去交錢啫。 唔會無腦到到「異常」哩啲模棱兩可嘅字眼。


真係異常?

如果服務真係異常到會即日影響你服務的話， 我諗應該發生大規模故障， 哩個時間， 我諗佢地CS應該聽唔切電話， 邊仲有異常地空閒去通知你「異常」。



伸延閱讀
分享


使用者資訊

QuoQuoAPP Ltd 版權 © 2024